Woche 52 2014

Heiligabend von Otto Schröder

Nu leggt de Sorgen all bisid
Un wat jug drückt de lange Tid;
De flitig Hand nu utrauhn deiht.
Makt up dat Hart, hürt tau wo’t sleiht.
Heil Christdag nehm uns an den Tom:
De Lichter brenn‘ an’n Dannenbom!

De Lichter brenn‘ ehr heilig Licht
Wist ok uns‘ Seel de gode Richt
Un lett bi sinen warmen Schin
Uns wedder fram as Kinner sin
Un weigt uns in den schönsten Drom:
De Lichter brenn‘ an’n Dannenbom!

Ja makt bi dissen stillen Glanz
De Harten up un fäuhlt dat ganz,
Dat Bräuder wi, un Leiw uns‘ Feld,
Dat driwwt den Düwel ut de Werlt.
Un wat uns des‘ un de eins dahn
Un wer noch in uns‘ Schaulbauk stahn.
Von hüt an sünd wi all uns quitt,
Hüt sünd de ganzen Siden witt,
Dat Freden unner’n Himmelsdom:
De Lichter brenn‘ an’n Dannenbom!